Re: [R@ntau-Net] batanyo

Wed, 09 Jun 2004 20:50:06 -0700

Assalamu'alaikum Wr.Wb.
 
dek jauah kampuang  nan dijalang
kelok baliku bakeh jalan
bana sungguah talambek ambo manjalang
maaf dimintak bakeh ....... Sutan
 
Ma .... Sutan
 
Pihak disambah nan mandatang
takilek bagai caramin
tabayang umpamo paneh
tatabua dimuko rapek
 
kok didanga lah baiak bunyi
kok dipandang rancak rupo
kurang tak ado ka panukuak
senteng tak ado ka pambilai
manarah alah aluran garih
bakato lai dialua bana
barih balabeh lah sasuai
ukua jo jangko iyo takanak
 
kok pintak alah sutan bari
pihak dikandak alah bapalakukan
nak ulam pucuak manjulai
na aia pincuran tabik
 
rasono alah tibo ditampaikno. alah kasanang hati Sutan ....
 
baa to no nan kini nangko,
 
sungguah pun Sutan dari kurai
bukan maninjau nagari asa
disiko mangko dapek kato sasuai
di nan lamo mangko takana.
 
nan ketek namono  kurai
nan gadang iyo banuhampu
disiko latak kato sasuai
iyo Kurai Banuhampu
 
sariak jo sungai pua
batagak batu palano
disiko nan lamo jadi takana
badunsanak malah kito kirono
 
nan isisno bana, lah basak takana mandi
 
rumah gadang bari bapintu, nak tarang jalan ka halaman
dari ambo hanyo sakitu, rundiangan babaliak kapado Sutan
 
putuh banang uleh jo tali
putuh tali uleh jo rotan
daharok bunyi nak kumbali
pulang maklum pado Sutan
 
Wassalamu'alaikum Wr.Wb.
 
 
Bandaro Labiah

jun aidi <[EMAIL PROTECTED]> wrote:
Wa'alaikum salam wr. wb.
 
Mak Bandaro Labiah nan dianjuang tinggi diamba gadang.
Anau kaciak gadang palapah
tolonglah runduak runduak-an
awak kaciak mudo matah
kok salah tolong tunjuak-an
Tipak dibadan diri ambo, kok dibukak sitambo lamo dipiliah atah ciek ciek, diliek dari garih mandeh iyo barasa dari Magek Tilatang Kamang, tapi mandeh ambo lahia dan gadang di Kurai Limo Jorong karano inyiak ambo urang Kurai sadangkan dari tipak bapak ambo babako ka Talang Tangah Batusangka.
sairing balam jo barabah
balam lalu barabah mandi
sairing salam jo sambah
salam lau sambah kumbali
 
wassalam
 
Junaidi (37), kandang singo

Bandaro Labiah <[EMAIL PROTECTED]> wrote:

Yahoo! Messenger - Communicate instantly..."Ping" your friends today! Download Messenger Now
____________________________________________________
Berhenti/mengganti konfigurasi keanggotaan anda, silahkan ke: 
http://groups.or.id/mailman/options/rantau-net
____________________________________________________

Kirim email ke