Assalamu'alaikum.w.w.
Banyak carito nan dicaritokan, banyak ota nan diotakan (warisan, meminang dlsb), tapi ota lah bagalau,alah sulik mancaliak salah jo bana, bantuak bagatah dibaok ka
ilalang, lah batali tamali. Rancak kito mancari nan asas, nan punco, supayo mangarati
baa nan sabananyo, baa mangko takah itu kiniko. Sabab urusan rang padusi ko iyo
sensitif dan alah dikaji sajak zaman niniak kaliko. Ama ba'du, mari kito muloi.
Barang rancak tinggi harago barang buruak murah harago, iko logika formal, dan indak
bisa dituka kecuali dikicuah jo galomok. Tapi barang rancak ko bisa pulo indak
taparatian dek urang dek karano alaik paragaiknyo (asesories) nyo indak ado, indak
rancak, kumuah, dan sagalo macamnyo, sahinggo kalah juo haragonyo dek nan buruak,
sabaliaknyo nan buruak bisa tinggi harago kalau alaik paragaiknyo ko barasiah, rancak
(menarik). Nan ciek lai tampek lataknyo, walaupun barang tu jo alaik paragaik nan
rancak tapi indak rancak tampek lataknyo kurang juo haragonyo daripado barang nan
talatak di tempek nan elok walaupun buruak...... Iko filosofi barang....(barang di kaki limo agak sulik kito malatakkan harago tinggi samo jo barang nan di etalase toko walaupun barangnyo samo).
Apolai manusia, tantu labiah tinggi dari itu, kalau barang sajo, alaik paragaiknyo jo
tampeknyo harus dicarikan nan rancak untuak maninggikan haragonyo, baitupulo
manusia, alaik paragaik jo tampeknyo harus dicarikan nan rancak supayo tinggi pulo
haragonyo. Harago disiko tantu harago diri si manusia tu. Alaik paragaik nan dimukasuik
tantulah "parangai", tingkah laku, akhlaq. Cuma zaman kiniko dek urang kilaki, alaik
paragaik ko lah batuka jo oto rancak jo rumah rancak dan pitih banyak. Hal-hal nan
dalam wakatu sabanta bisa hilang lenyap kok tibo musibah, balain jo akhlaq, tapi sayang
zaman kiniko urang kurang memperhatikan akhlaq.
Urang padusi takah itu pulo, akhlaq adolah alaik paragaik nan kabisa mambuek awak
manjadi rancak dipandang urang atau sabaliaknyo indak baharago. Urang gaek dulu-dulu
acok manyabuik ka anak gadihnyo, "bantuak iyo indak bisa diubah, parangai lai".
Aratinyo kok parangai diubah manjadi rancak, ado juo urang nan kamaharagoi awak, dan ujuang-ujuang nyo beko ado juo urang nan nio jo awak. (Cuman kiniko prinsip rang gaek
ko lah kanai cimeeh, "Wajah boleh diubah dengan operasi plastik, perangai gimana ?,
memang udah dari sono nyee...mau gimana lagi...", he he he he). Sabab bantuak rancak
bukan jaminan, tigo puluah limo kaateh urang kilaki lah indak nio mancaliak awak lai.
Tapi kalau parangai nan dipertahankan rancak, urang kilaki bapikia saribu kali untuak
mancari nan lain, takuik indak kadapek nan kasarupo, kalau nyo turuik nafsunyo, inyo
akan manyasa kudian (banyak kajadian urang kilaki gilo sasudah bini nan dicaraikannyo
kawin jo urang lain, dek aa, dek ulah nafsu nan bapaturuikkan).
...(Ndeeh, kalau lah tamulai indak namuah baranti, mbek cah mari kito inok ranuangkan
dulu agak sajamang... kito sambuang barisuak....)
Wassalam
St. Sinaro
Do you Yahoo!?
Protect your identity with Yahoo! Mail AddressGuard
