Assalamu�alaikum wr.wb.,
NJEK SAYO
Lai nan tau langsuang arati istilah ko? �Njek sayo�.
Kato-kato nan mungkin alah samakin langka, samakin
jarang dibaco urang kini. Enek ambo saisuak acok
mampagunoan kato-katoko. A kato dasarno, sampai kini
indak jaleh diambo doh. �Njek� rasono, bararati
�untuak�. �Njek sia go iko = untuak sia go iko�. Tapi
nan �sayo� dalam konteks ko indak jaleh diambo a
mukasuikno. Mungkin paralu dicarian di kamus gadang
Bandaro arati kato-katoko nampakno.
Namun sacaro kasaluruhan arati �njek sayo� ko adolah
�tabuang sio-sio dek salah uruih�. Banyak ungkapan
enek ambo saisuak nan panah tadanga di ambo.
�Njek sayo sin den baranak.� Iko ungkapan urang gaek
nan panek-panek manggadangan anak namun si anak indak
�manolong� saketek juo. Anak cako lah gadang, tapi
indak mambari manfaaik saketek juo doh. Pamaleh,
palasua, pokokno sagalo kurang. Nan amuah iyo ciek
makan sajo. Biaya untuak iduik paralu juo. Mancari
indak pandai. Kalualah ungkapan satangah panyasalan
sarupo tadi itu.
�Njek sayo gulai sakuali dek lupo maangek-an.� Dek
lupo maangek-an gulai, jadi rasanno, indak dapek
dimakan lai. Tacampak nan jadi.
�Njek sayo sin rumah gadang-gadang dibuek, awak abih
pai marantau.� Rumah dibuek gadang-gadang, indak
baunyian, dek anak kamanakan jo inyiak jo mamak abih
pai marantau kasadoalahanno. Dan seterusnya...dan
seterusnya......
****
Hasia paretongan suaro PAMILU, nan tajadi dima-dima.
Partai Islam alif dapek 100,000 suaro. Partai Islam ba
dapek 110,000 suaro. Partai Islam ta, 120,000. Nan
tsa, 130,000. Nan jim 140,000. Untuak mandapek ciek
kurisi di Senayan, paralu 300,000 suaro. Propinsi
Nagari Antah Barantah Bagian Barat punyo sapuluah
wakia, dek jumlah pamiliah di nagari tu 3,000,000
urang. Nan tujuah kurisi lah dapek di urang, indak
ciek juo nan untuak �awak� doh. Untuak tigo kurisi nan
tingga, dek indak ado nan dapek suaro panuah lai,
diuji sia nan paliang tinggi. Dua partai urang
masiang-masiang mandapek suaro 155,000 jo 145,000.
Dapek pulo lah di nan baduo ko kurisi ciek surang.
Untuang kamujua, kasudahanno dapek juo Partai Islam
jim, pangumpua suaro tabanyak dari rinuak-rinuak nan
tingga. Padohal..... padohal goha, kok kalimo partai
cakotu indak �bapetai-petai�, cukuik ciek Partai Islam
sajo, mareka dapek duo kurisi. Suaro �umaik Islam� nan
600,000 urang di limo partai cako, iyo disalamaik-an
�paraturan� sajo untuak mandapek ciek kurisi lai.
300,000 suaro, jadi �njek sayo�.
****
Padohal...padohal goha, sajak dari mak Malin nan jadi
caleg di tangah-tangah pulau Perca tu, sampai
katua-katua partai Islam nan banyak tu, tau
satau-tauno, surek bara ayat bara nan mampitaruahkan
ka urang-urang nan bariman untuak �bapacik arek ka
tali Allah, indak ba�firqah-firqah�, indak bapacah
balah. Tapi kadipangaan, antaro tau, jo paam, jo
mangarati, acok kali indak sajalan. Dek ado pulo
partimbangan lain nan labiah paralu.
Wassalamu� alaikum wr.wb.,
Lembang Alam
=====
St. Lembang Alam
__________________________________
Do you Yahoo!?
Yahoo! Tax Center - File online by April 15th
http://taxes.yahoo.com/filing.html
____________________________________________________
Berhenti/mengganti konfigurasi keanggotaan anda, silahkan ke:
http://groups.or.id/mailman/options/rantau-net
____________________________________________________
